പത്താന്‍ ക്ലൈമാക്സ് ഷൂട്ടിങ്ങ്; ഷാറൂഖിനൊപ്പം സല്‍മാനും ബുര്‍ജ് ഖലീഫയില്‍

ഷാറൂഖ് ഖാന്റെ പുതിയ ചിത്രം പത്താന്റെ ക്ലൈമാക്സ് ചിത്രീകരണം ദുബായിയിലെ ബുര്‍ജ് ഖലീഫയിലെന്ന് റിപ്പോര്‍ട്ടുകള്‍. ചിത്രത്തിന്റെ ക്ലൈമാക്സില്‍ ബോളിവുഡ് താരം സല്‍മാന്‍ ഖാന്‍ അതിഥി വേഷത്തിലെത്തുമെന്ന റിപ്പോര്‍ട്ടുകള്‍ നേരത്തെ വന്നിരുന്നു.
ഇതാദ്യമായാണ് ബുര്‍ജ് ഖലീഫയില്‍ ഒരു ബോളിവുഡ് ചിത്രത്തിന്റെ ഷൂട്ട് നടക്കുന്നത്. ബോളിവുഡില്‍ ഇതുവരെ കാണാത്ത രീതിയിലുള്ള സംഘട്ടന രംഗങ്ങളാണ് പത്താനിലുള്ളതെന്നാണ് സൂചന.
കഴിഞ്ഞ മാസം അവസാനമാണ് ചിത്രത്തിലെ സംഘട്ടന രംഗങ്ങള്‍ ചിത്രീകരിക്കുന്ന വീഡിയോ സമൂഹമാധ്യമങ്ങളില്‍ വൈറലായത്. ഹോളിവൂഡ് ചിത്രമായ മിഷന്‍ ഇംപോസിബിളിലെ പോലത്തെ രംഗങ്ങളാണ് പത്താനിലുള്ളതെന്നാണ് ആരാധകരുടെ വാദം.
രണ്ട് വര്‍ഷത്തിന് ശേഷം ഷാറൂഖ് ഖാന്‍ അഭിനയിക്കുന്ന പത്താന്‍ ഒരു സപൈ-ത്രില്ലറാണ്. ചിത്രത്തില്‍ ദീപിക പദുകോണാണ് നായിക. ചിത്രത്തില്‍ സല്‍മാന്‍ ഖാന്‍ അതിഥി വേഷത്തിലെത്തുമെന്നാണ് സൂചന. സിദ്ധാര്‍ഥ് ആനന്ദാണ് പത്താനിന്റെ സംവിധായകന്‍.
2018ല്‍ പുറത്തിറങ്ങിയ 'സീറോ' എന്ന ആനന്ദ് എല്‍ റായ് ചിത്രത്തിലാണ് ഷാറൂഖ് ഖാന്‍ അവസാനമായി അഭിനയിച്ചത്. ചിത്രത്തില്‍ കത്രീന കൈഫ്, അനുഷ്‌ക ഷര്‍മ്മ എന്നിവരായിരുന്നു നായികമാര്‍. 'ലയണ്‍ കിങിന്റെ' ഹിന്ദി പകര്‍പ്പില്‍ മുസാഫ എന്ന കഥാപാത്രത്തിന് ശബ്ദം നല്‍കിയത് ഷാറൂഖ് ഖാനായിരുന്നു