‘സന്തോഷത്തിന്റെ ഒന്നാം രഹസ്യം’; അടുത്തിടെ കണ്ട ഏറ്റവും നല്ല സിനിമയെന്ന് അഹാന കൃഷ്ണ

ഡോണ്‍ പാലത്താര സംവിധാനം ചെയ്ത ‘സന്തോഷത്തിന്റെ ഒന്നാം രഹസ്യം’ താന്‍ അടുത്തിടെ കണ്ടതില്‍ വെച്ച് ഏറ്റവും നല്ല ചിത്രമാണെന്ന് നടി അഹാന കൃഷ്ണ. ഐഎഫ്എഫ്‌കെയില്‍ വെച്ചാണ് അഹാന സിനിമ കാണുന്നത്. ചിത്രത്തിന്റെ അണിയറ പ്രവര്‍ത്തകരെ കുറിച്ച് നല്ല അഭിപ്രായമാണ് അഹാന തന്റെ ഇന്‍സ്റ്റഗ്രാം സ്റ്റോറിയിലൂടെ പറഞ്ഞിരിക്കുന്നത്.

‘ഞാന്‍ നിങ്ങളോട് ഒരു ചെറിയ കഥ പറയാം. ചിലപ്പേള്‍ പലര്‍ക്കും ഇതറിയാമായിരിക്കും. ഇതെന്റെ പ്രിയ സുഹൃത്ത് ജിതിന്‍ പുത്തന്‍ചേരിയാണ്. കുറച്ച് ദിവസം മുമ്പ് ഇവനെ കുറിച്ച് എനിക്ക് വലിയ അഭിമാനം തോന്നി. ഐഎഫ്എഫ്‌കെയില്‍ വെച്ചാണ് സംഭവം. സന്തോഷത്തിന്റെ ഒന്നാം രഹസ്യം എന്നൊരു മനോഹരമായ സിനിമ അവന്‍ ചെയ്തു. കൂടെ റിമയും ഉണ്ട്. ഐഎഫ്എഫ്‌കെയില്‍ ഔദ്യോഗികമായി തിരഞ്ഞെടുക്കപ്പെട്ട ചിത്രമാണിത്. ഞാന്‍ അടുത്ത കാലത്ത് കണ്ടതില്‍ വെച്ച് നല്ലൊരു ചിത്രമാണിത്. ജീവിതത്തെ വളരെ മനോഹരമായി ഡോണ്‍ പാലത്താര എഴുതിയിട്ടുണ്ട്. സിങ്കിള്‍ ഷോട്ടില്‍ എടുത്ത ചിത്രമാണിത്. അഭിനയവും എടുത്ത് പറയേണ്ടതാണ്. എന്തായാലും കാണേണ്ട ഒരു സിനിമ തന്നെ’.

അഹാന കൃഷ്ണ

സന്തോഷത്തിന്റെ ഒന്നാം രഹസ്യത്തില്‍ ജിതിന്‍ പുത്തന്‍ചേരി, റിമ കല്ലിങ്കല്‍ എന്നിവരാണ് കേന്ദ്ര കഥാപാത്രങ്ങള്‍. ഒരൊറ്റ ഷോട്ടില്‍ എടുത്ത 85 മിനിറ്റ് ധൈര്‍ഘ്യമുള്ള ചിത്രമാണത്. കേരളത്തിന്റെ രാജ്യാന്തര ചലച്ചിത്ര മേളയിലാണ് ചിത്രത്തിന്റെ പ്രദര്‍ശനം നടന്നത്.

അതേസമയം ദുല്‍ഖര്‍ സല്‍മാന്റെ നിര്‍മ്മാണത്തില്‍ പ്രശോഭ് വിജയന്‍ സംവിധാനം ചെയ്ത ‘അടി’ എന്ന ചിത്രത്തിന്റെ ഷൂട്ടിങ്ങിലായിരുന്നു അഹാന. ഷൈന്‍ ടോം ചാക്കോ, അഹാനാ കൃഷ്ണ, ധ്രുവന്‍, എന്നിവരാണ് കേന്ദ്ര കഥാപാത്രങ്ങള്‍. ഇഷ്‌ക്കിന്റെ’ തിരക്കഥാകൃത്ത് രതീഷ് രവിയാണ് തിരക്കഥ ഒരുക്കിയിരിക്കുന്നത്. ഫായിസ് സിദ്ദിഖ് ഛായാഗ്രഹണം നിര്‍വ്വഹിക്കുന്ന ചിത്രത്തിന്റെ എഡിറ്റര്‍ നൗഫലാണ്. ഗോവിന്ദ് വസന്ദയാണ് ചിത്രത്തിന്റെ സംഗീത സംവിധാനം. കോസ്റ്റ്യൂം – സ്റ്റെഫി സേവ്യര്‍, ആര്‍ട്ട് – സുഭാഷ് കരുണ്‍, മേക്കപ്പ് – രഞ്ജിത് ആര്‍ എന്നിവരാണ് മറ്റ് അണിയറ പ്രവര്‍ത്തകര്‍.