കത്രീന കൈഫും വിക്കി കൗശലും വിവാഹിതരാകുന്നുവെന്ന് റിപ്പോര്‍ട്ട്

ഡിസംബര്‍ ഒന്ന് മുതല്‍ വിവാഹത്തോടനുബന്ധിച്ചുള്ള ചടങ്ങുകള്‍ ആരംഭിക്കുമെന്നാണ് ഇരുവരോടും അടുത്ത വൃത്തങ്ങള്‍ പറയുന്നത്. രാജസ്ഥാനിലെ രന്തമ്പോര്‍ നാഷണല്‍ പാര്‍ക്കില്‍ നിന്ന് 30 മിനിറ്റ് അകലെ സ്ഥിതി ചെയ്യുന്ന സിക്സ് സെന്‍സസ് ഫോര്‍ട്ട് ബര്‍വാര എന്ന റിസോര്‍ട്ടില്‍ വച്ചാകും വിവാഹം നടക്കുക. സബ്യസാചി മുഖര്‍ജി ഡിസൈന്‍ ചെയ്യുന്ന വസ്ത്രങ്ങളാകും ഇരുവരും വിവാഹത്തിന് അണിയുകയെന്നും റിപ്പോര്‍ട്ടുണ്ട്. എന്നാല്‍ വിവാഹ വാര്‍ത്തയോട് ഇതുവരെ താരങ്ങള്‍ പ്രതികരിച്ചിട്ടില്ല. നേരത്തെ, ബോളിവുഡ് താരം രാജ്കുമാര്‍ റാവോ വിവാഹിതനാകുന്നുവെന്ന റിപ്പോര്‍ട്ടും പുറത്തുവരുന്നുണ്ട്. നവംബറില്‍ രാജ്കുമാര്‍ നടി പത്രലേഖയെ വിവാഹം കഴിക്കുമെന്നാണ് അടുത്തവൃത്തങ്ങള്‍ നല്‍കുന്ന സൂചന. അടുത്ത ബന്ധുക്കളും സുഹൃത്തുക്കളും മാത്രം പങ്കെടുക്കുന്ന സ്വകാര്യ ചടങ്ങിലായിരിക്കും വിവാഹം നടക്കുക. ബോളിവുഡിലെ ചില സുഹൃത്തുക്കളെ ഇതിനോടകം ക്ഷണിച്ച് കഴിഞ്ഞുവെന്നും റിപ്പോര്‍ട്ടുണ്ട്. കഴിഞ്ഞ ആറ് വര്‍ഷമായി രാജ്കുമാറും പത്രലേഖയും തമ്മില്‍ പ്രണയത്തിലാണ്. നവമാധ്യമങ്ങളിലടക്കം ഇരുവരും ഒരുമിച്ചുള്ള ചിത്രങ്ങള്‍ പോസ്റ്റ് ചെയ്യാറുണ്ട്. രാജ്കുമാര്‍ കേന്ദ്രകഥാപാത്രത്തിലെത്തിയ സിറ്റിലൈറ്റ്സ് എന്ന ചിത്രത്തിലൂടെ ബോളിവുഡില്‍ അരങ്ങേറ്റം കുറിച്ച പത്രലേഖ, ലൗ ഗെയിംസ്, ബദ്നാം, ഗലി, നാനു കി ജാനു എന്നീ ചിത്രങ്ങളിലും വേഷമിട്ടിട്ടുണ്ട്. ലവ്, സെക്സ് ഓര്‍ ദോഖ എന്ന ചിത്രത്തിലൂടെ അഭിനയരംഗത്തെത്തിയ രാജ്കുമാര്‍ റാവോ 2013 ല്‍ പുറത്തിറങ്ങിയ കായ് പോ ചെ എന്ന സിനിമയിലൂടെയാണ് ശ്രദ്ധിക്കപ്പെടുന്നത്.