‘ഓര്‍മയില്ലേ ഇവിടം’; കാവല്‍ നവംബര്‍ 25 തിയേറ്ററുകളിലേക്ക്; പ്രേക്ഷകരെ ക്ഷണിച്ച് സുരേഷ് ഗോപി

കൊവിഡിന്റെ നീണ്ട ഇടവേളയ്ക്ക് ശേഷം തിയറ്ററുകള്‍ തുറന്ന് പ്രവര്‍ത്തിക്കുമ്പോള്‍ ആദ്യം റിലീസ് ചെയ്യുന്ന സൂപ്പര്‍ താര ചിത്രമാണ് കാവല്‍. സുരേഷ് ഗോപിയെ നായകനാക്കി നിഥിന്‍ രഞ്ജി പണിക്കര്‍ രചനയും സംവിധാനവും ചെയ്യന്ന ചിത്രം ഒരിടവേളയ്ക്കുശേഷം തിയറ്ററുകളില്‍ പ്രദര്‍ശിപ്പിക്കുകയാണ്. തിയേറ്ററില്‍ നവംബര്‍ 25 ന് കാവല്‍ റീലിസ് ചെയ്യുന്ന സന്തോഷം പങ്കുവെയ്ക്കുന്ന ഒരു വീഡിയോ പുറത്തുവിട്ടിരിക്കുകയാണ് സുരേഷ് ഗോപി. ഓര്‍മയില്ലേ ഇവിടം. വെളിച്ചവും ഇരുളും വര്‍ണ്ണങ്ങളും നിറഞ്ഞ മായക്കാഴ്ചകളുടെ വിരിഞ്ഞ വിസ്തൃതി. മഹാമാരിയുടെ ഇടവേള ജീവിതത്തിലും തിയറ്ററുകളിലും ഇതാ ഇടവേള കഴിയുകയായി. നമ്മള്‍ ഒരുമിച്ചിരുന്ന് ആസ്വദിച്ച, ആഹ്ലാദിച്ച നിമിഷങ്ങള്‍. നമ്മള്‍ സ്വയം മറന്ന് ആര്‍ത്ത് ചിരിച്ച, ആര്‍പ്പ് വിളിച്ച, സ്വയമറിയാതെ നമ്മള്‍ കണ്ണീരണിഞ്ഞ, നമ്മള്‍ ഇടിമുഴക്കം പോലെ കരഘോഷം മുഴക്കിയ സിനിമയുടെ മഹോത്സവ ദിനങ്ങള്‍ക്ക് ഇതാ കൊട്ടുംകൊരവയുമായി വീണ്ടും കൊടിയേറ്റം. ഇനി ജീവിതത്തിന്, സിനിമയ്ക്ക് തിരിച്ചുവരവിന്റെ നാളുകള്‍. കരുത്തുറ്റിന്റെ വീണ്ടെടുപ്പിന്റെ, കൂടിച്ചേരലുകളുടെ ആഘോഷനാളുകള്‍ നവംബര്‍ 25 മുതല്‍ കരുത്തിന്റെ 'കാവല്‍' ദിനങ്ങള്‍ എന്നാണ് വീഡിയോയില്‍ സുരേഷ് ഗോപി പറയുന്നത്. ഗുഡ്വില്‍ എന്റര്‍ടെയ്ന്റമെന്റ്‌സിന്റെ ബാനറില്‍ ജോബി ജോര്‍ജാണ് ചിത്രം നിര്‍മ്മിക്കുന്നത്. പഞ്ച് ഡയലോഗുകളും മാസ്സ് സീക്വന്‍സുമുള്ള നായക കഥാപാത്രത്തെ ഒരു ഇടവേളക്ക് ശേഷമാണ് സുരേഷ് ഗോപി അവതരിപ്പിക്കുന്നത്. തമ്പാന്‍ എന്ന കഥാപാത്രത്തെയാണ് ചിത്രത്തില്‍ സുരേഷ് ഗോപി അവതരിപ്പിക്കുന്നത്. രഞ്ജി പണിക്കരും ചിത്രത്തില്‍ ശ്രദ്ധേയമായ വേഷം കൈകാര്യം ചെയ്യുന്നുണ്ട്. സുരേഷ് കൃഷ്ണ, സന്തോഷ് കീഴാറ്റൂര്‍, ശങ്കര്‍ രാമകൃഷ്ണന്‍,ശ്രീജിത്ത് രവി, രാജേഷ് ശര്‍മ്മ, കിച്ചു ടെല്ലസ്, കണ്ണന്‍ രാജന്‍ പി ദേവ് തുടങ്ങിയവര്‍ ചിത്രത്തില്‍ അണിനിരക്കുന്നു.ഛായഗ്രഹണം നിഖില്‍ എസ് പ്രവീണ്‍ നിര്‍വ്വഹിക്കുന്നു. ബി കെ ബരിനാരായണന്റെ വരികള്‍ക്ക് രഞ്ജിന്‍ രാജാണ് സംഗീതം നല്‍കിയിരിക്കുന്നത്. കല ദിലീപ് നാഥ്, മേക്കപ്പ് പ്രദീപ് രംഗനുമാണ്.