‘ആളുകള്‍ അപ്പുവിന്റെ പാത പിന്തുടരുന്നത് കാണുമ്പോള്‍ കണ്ണുനിറയുന്നു’; പുനീതിന്റെ ഭാര്യ

പവര്‍ സ്റ്റാര്‍ പുനീത് രാജ്കുമാറിന്റെ വിയോഗത്തില്‍ വികാരാധീനയായി പുനീതിന്റെ ഭാര്യ അശ്വിനി. പുനീതിന്റെ മരണം തങ്ങളുടെ കുടുംബത്തെ മാത്രമല്ല കര്‍ണാടക സംസ്ഥാനത്തെ മുഴുവന്‍ ദുഃഖത്തിലാഴ്ത്തിയെന്ന് അശ്വിനി പറഞ്ഞു. അപ്പുവിന്റെ പാത പിന്തുടര്‍ന്ന് ആളുകള്‍ നേത്രദാനത്തിന് തയ്യാറാകുന്നത് കാണുമ്പോള്‍ തന്റെ കണ്ണുനിറയുന്നുവെന്നും നിങ്ങളുടെ ഈ സത്പ്രവര്‍ത്തിയുടെ പേരില്‍ പുനീത് ആയിരങ്ങളുടെ ഹൃദയത്തില്‍ ജീവിക്കുമെന്നും അശ്വനി കൂട്ടിച്ചേര്‍ത്തു. അശ്വിനിയുടെ വാക്കുകള്‍ 'പുനീതിന്റെ മരണം ഞങ്ങളുടെ കുടുംബത്തെ മാത്രമല്ല കര്‍ണാടക സംസ്ഥാനത്തെ മുഴുവന്‍ ദുഃഖത്തിലാഴ്ത്തി. നിങ്ങളാണ് അദ്ദേഹത്തെ പവര്‍ സ്റ്റാര്‍ ആക്കിയത്. അതുകൊണ്ട് തന്നെ അദ്ദേഹത്തിന്റെ വിയോഗത്തിലുള്ള നിങ്ങളുടെ വേദന എനിക്ക് ഊഹിക്കാവുന്നതിലും അപ്പുറമാണ്. കടുത്ത ഹൃദയ വേദനയിലും നിങ്ങള്‍ നിയന്ത്രണം വിടുകയോ അനിഷ്ടസംഭവഭങ്ങള്‍ ഉണ്ടാവുകയോ ചെയ്തില്ല. അത് അദ്ദേഹത്തിന് എനിക്ക് നല്‍കന്‍ കഴിയുന്ന എറ്റവും നല്ല യാത്രയയപ്പായിരുന്നു. സിനിമയില്‍ നിന്നും മാത്രമല്ല, ഇന്ത്യയില്‍ നിന്നും വിദേശത്തു നിന്നും പുനീതിന് നല്‍കിയ അനുശോചനങ്ങളെ ഹൃദയഭാരത്തോടെ തിരിച്ചറിയുന്നു. അപ്പുവിന്റെ പാത പിന്തുടര്‍ന്ന് ആളുകള്‍ നേത്രദാനത്തിന് തയ്യാറാകുന്നത് കാണുമ്പോള്‍ ഞാന്‍ കണ്ണീരണിയുന്നു. നിങ്ങളുടെ ഈ സത്പ്രവര്‍ത്തിയുടെ പേരില്‍ പുനീത് ആയിരങ്ങളുടെ ഹൃദയത്തില്‍ ജീവിക്കും. ഞങ്ങളുടെ കുടുംബത്തിലെ ഓരോരുത്തരുടെയും പേരില്‍ നന്ദിയും സ്നേഹവും നിങ്ങളെ അറിയിക്കുന്നു'. ഒക്ടോബര്‍ 29നാണ് പുനീത് രാജ്കുമാര്‍ അന്തരിച്ചത്. ജിമ്മില്‍ വ്യായാമത്തിനിടെ ശാരീരിക അസ്വസ്ഥതകള്‍ പ്രകടിപ്പച്ച പുനീതിനെ അടുത്തുള്ള ക്ലിനിക്കിലും പിന്നീട് വിക്രം ആശുപത്രിയിലും പ്രവേശിപ്പിക്കുകയായിരുന്നു. അടിയന്തര ചികിത്സ നല്‍കിയെങ്കിലും മരണം സംഭവിച്ചു. ഉച്ചക്ക് 2.30ന് മരണം സ്ഥിരീകരിക്കുകയായിരുന്നു.