ഐഎഫ്എഫ്ഐയില്‍ അതിഥിയായി സാമന്ത; ഫോട്ടോ പങ്കുവെച്ച് താരം

രാജ്യാന്തര ചലച്ചിത്രമേളയില്‍ അതിഥിയായി നടി സാമന്ത. ഫാമിലി മാന്‍ 2 വെബ് സീരിസിന്റെ സംവിധായകരായ രാജ് നിധിമൊരു കൃഷ്ണ ഡികെ എന്നിവര്‍ക്കൊപ്പമാണ് താരം ചലച്ചിത്രമേളയിലേക്കെത്തിയത്. എന്നാല്‍ സീരിസിലെ നടന്‍ മനോജ് ബാജ്പേയ് ഫെസ്റ്റിവലില്‍ പങ്കെടുക്കാന്‍ നേരിട്ടെത്തിയില്ല. പകരം വീഡിയോ കോളിലൂടെ ചര്‍ച്ചയില്‍ പങ്കെടുത്തു. താരം വിവരങ്ങള്‍ സോഷ്യല്‍ മീഡിയയില്‍ പങ്കുവെച്ചു. ആമസോണ്‍ സംഘടിപ്പിച്ച ചര്‍ച്ചയില്‍ പങ്കെടുക്കാനാണ് സാമന്ത ചലച്ചിത്രമേളയില്‍ എത്തിയത്. 'എല്ലാ മാറ്റങ്ങളും ഉണ്ടാക്കുന്ന ആളുകള്‍ക്കൊപ്പം' എന്ന് താരം ഇന്‍സ്റ്റാഗ്രാമില്‍ പങ്കുവെച്ച ഫോട്ടോയ്ക്കൊപ്പം കുറിച്ചു. മനോജ് ബാജ്പേയ്, സാമന്ത, പ്രിയാമണി തുടങ്ങിയവരെ കേന്ദ്രകഥാപാത്രങ്ങളാക്കിയാണ് ഫാമിലി മാന്‍ 2 വെബ് സീരിസ് ഒരുക്കിയിരിക്കുന്നത്. 9 എപ്പിസോഡുകളുളള സീസണ്‍ 2 ജൂണ്‍ 4നാണ് ആമസോണ്‍ പ്രൈമിലാണ് റിലീസ് ചെയ്തത്. സീരിസിന്റെ തിരക്കഥയെഴുതി സംവിധാനം ചെയ്തിരിക്കുന്നത് രാജ് ആന്‍ഡ് ഡികെയാണ്. ആദ്യസീസണില്‍ 10 എപ്പിസോഡുകളും പുതിയ സീസണില്‍ 9 സീസണുകളുമാണുള്ളത്. രാജി എന്ന ശ്രീലങ്കന്‍ പെണ്‍കുട്ടിയായുള്ള സാമന്തയുടെ പ്രകടനം ഏറെ ജനശ്രദ്ധനേടിയിരുന്നു. വിണ്ണൈത്താണ്ടി വരുവായ എന്ന ചിത്രത്തിലൂടെയാണ് താരം അഭിനയ രംഗത്തേക്ക് എത്തുന്നത്. മനം, അഞ്ചാന്‍, കത്തി, തെരി, ജനത ഗാരേജ്, മേഴ്സല്‍, മജിലി, നീതാനെ എന്‍ പൊന്‍വസന്തം, ഓട്ടോനഗര്‍ സൂര്യ, 10 എന്‍ഡ്രതുക്കുള്ള തുടങ്ങി ഒട്ടേറെ ചിത്രങ്ങളിലും സാമന്ത നായികയായിട്ടുണ്ട്. വിഘ്നേശ് ശിവന്‍ സംവിധാനം ചെയ്യുന്ന ചിത്രം കാതുവാകുല രണ്ട് കാതല്‍ എന്ന ചിത്രത്തിലാണ് സാമന്തയിപ്പോള്‍ അഭിനയിക്കുന്നത്. നായന്‍താരയും വിജയ് സേതുപതിയുമാണ് ചിത്രത്തിലെ മറ്റു കഥാപാത്രങ്ങള്‍.