നാളെ ചരിത്ര ദിവസം ‘കുഞ്ഞാലിയുടെയും മലയാള സിനിമയുടെയും’

മോഹന്‍ലാല്‍ കേന്ദ്രകഥാപാത്രമായെത്തുന്ന 'മരക്കാര്‍ അറബിക്കലിന്റെ സിംഹം' നാളെ റിലീസ് ചെയ്യുകയാണ്. സിനിമ ലോകമെമ്പാടും 4100 സ്‌ക്രീനുകളിലാണ് പ്രദര്‍ശനത്തിനെത്തുന്നത്. പ്രതിദിനം 16,000 ഷോകള്‍ റിലീസ് ചെയ്യുമെന്നും ആശിര്‍വാദ് സിനിമാസ് അവരുടെ ഫേസ് ബുക്കില്‍ കുറിച്ചു. 'നാളെ ചരിത്ര ദിവസം, കുഞ്ഞാലിയുടെയും മലയാള സിനിമയുടെയും' എന്ന ക്യാപ്ക്ഷനോടു കൂടിയാണ് ആശിര്‍വാദ് അവരുടെ പേജില്‍ ചിത്രം പങ്കുവെച്ചത്. കേരളത്തിലെ ആകെ 631 റിലീസ് സ്‌ക്രീനുകളില്‍ 626 സ്‌ക്രീനുകളിലും നാളെ മരക്കാര്‍ ആയിരിക്കും പ്രദര്‍ശിപ്പിക്കുന്നത്. ഇക്കാര്യം ഇന്നലെ ചിത്രത്തിന്റെ നിര്‍മ്മാതാവ് ആന്റണി പെരൂമ്പാവൂരും വ്യക്തമാക്കിയിരുന്നു. മരക്കാറിന്റെ ബജറ്റ് 100 കോടിയാണ്. തന്റെ ജീവിത്തിലെ ഏറ്റവും ചിലവേറിയ സിനിമയാണിതെന്ന് സംവിധായകന്‍ പ്രിയദര്‍ശന്‍ പറഞ്ഞിരുന്നു. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, സന്തോഷ് ടി കുരുവിള, റോയ് സി ജെ എന്നിവരാണ് ചിത്രം നിര്‍മ്മിക്കുന്നത്. മഞ്ജു വാര്യര്‍, സുനില്‍ ഷെട്ടി, പ്രഭു, കീര്‍ത്തി സുരേഷ് എന്നിവരാണ് ചിത്രത്തിലെ മറ്റ പ്രധാന കഥാപാത്രങ്ങള്‍. അനില്‍ ശശിയും പ്രിയദര്‍ശനും ചേര്‍ന്നാണ് ചിത്രത്തിന്റെ തിരക്കഥ നിര്‍വ്വഹിച്ചിരിക്കുന്നത്. തമിഴ് സിനിമ ഛായാഗ്രാഹകനായ തിരുനാവകാരസുവാണ് ചിത്രത്തിന്റെ ക്യാമറ ചെയ്തിരിക്കുന്നത്.