‘അന്‍പോട കാതലന്‍ നാന്‍ എഴുതും ഡയലോഗ്’; ഡബ്ബിങ് വിശേഷങ്ങളുമായി വിഘ്‌നേഷ് ശിവന്‍

വിഘ്‌നേശ് ശിവന്റെ സംവിധാനത്തിലുള്ള ഏറ്റവും പുതിയ ചിത്രം 'കാതുവാക്കുള രണ്ടു കാതല്‍' പോസ്റ്റ് പ്രൊഡക്ഷന്‍ ഘട്ടത്തിലാണ്. നയന്‍താര നായികയായി എത്തുന്ന തന്റെ ചിത്രത്തെക്കുറിച്ചുള്ള വിശേഷങ്ങളാണ് ഇപ്പോള്‍ വിഘ്‌നേശ് ശിവന്‍ സോഷ്യല്‍ മീഡിയയില്‍ പങ്കുവച്ചിരിക്കുന്നത്. പോസ്റ്റ് പ്രൊഡക്ഷന്റെ ഭാഗമായി നയന്‍താര ഡബ്ബ് ചെയ്യുന്നതിന്റെ ഫോട്ടോയും പങ്കുവച്ചുകൊണ്ടായിരുന്നു വിഘ്‌നേശ് ശിവന്‍ എത്തിയത്. 'അന്‍പോടെ കാതലന്‍… നാന്‍ എളുതും ഡയലോഗ്' എന്ന് പറഞ്ഞുകൊണ്ടാണ് ഡബ്ബിങ് വിശേഷം വിഘ്‌നേശ് ശിവന്‍ പങ്കുവെച്ചത്. നയന്‍ വിഘ്‌നേഷ് ജോഡികളുടെ വിശേഷം അറിയാന്‍ ആകാംഷയോടെ കാത്തിരുന്ന ആരാധകര്‍ മികച്ച പ്രതികരണമാണ് പോസ്റ്റിനു താഴെ രേഖപ്പെടുത്തിയത്. വളരെക്കാലമായി പ്രണയത്തിലായ ഇരുവര്‍ക്കും നിരവധി ഫാന്‍സ് ആണ് ഇതിനോടകം തന്നെ ഉള്ളത്. ഇരുവരുടെയും വിവാഹം വൈകാതെ നടക്കുമെന്ന വാര്‍ത്തകളും ഇയിടെ പുറത്തുവന്നിരുന്നു. ഇതിനിടെയാണ് 'കാതുവാക്കുള രണ്ടു കാതല്‍' എന്ന തമിഴ് ചിത്രത്തിന്റെ വാര്‍ത്തകളും എത്തുന്നത്. കണ്‍മണി എന്ന കഥാപാത്രമാണ് നയന്‍താരയുടേത്. ഇതിനു മുന്‍പും ചിത്രവുമായി ബന്ധപ്പെട്ട പോസ്റ്റുകള്‍ വിഘ്‌നേഷ് സോഷ്യല്‍ മീഡിയയില്‍ പങ്കുവച്ചിരുന്നു. വിഘ്‌നേശ് ശിവനും നയന്‍താരയും ചേര്‍ന്ന് റൗഡി പിക്‌ചേഴ്‌സിന്റെ ബാനറിലാണ് ചിത്രം നിര്‍മിക്കുന്നത്. വിഘ്‌നേശ് ശിവന്‍ തന്നെയാണ്ചി ത്രത്തിന്റെ തിരക്കഥയൊരുക്കിയിരിക്കുന്നത്. 'പാവ കഥൈകളെ'ന്ന ആന്തോളജി ചിത്രമാണ് വിഘ്‌നേശ് ഏറ്റവും ഒടുവില്‍ സംവിധാനം ചെയ്തത്.