വിഷ്വല്‍ ഇഫക്ട്‌സ്; പ്രഥമ സംസ്ഥാന ചലച്ചിത്രപുരസ്‌കാരം വയനാട്ടുകാരന്

വിഷ്വല്‍ ഇഫക്ട്‌സ് സാങ്കേതികതയിലെ പ്രഥമ സംസ്ഥാന ചലച്ചിത്ര പുരസ്‌കാരം വയനാട്ടുകാരനായ സുമേഷ് ഗോപാലിന്. സംസ്ഥാന സര്‍ക്കാര്‍ ഇത്തവണ ചലച്ചിത്ര അവാര്‍ഡ് നിര്‍ണയത്തില്‍ ആദ്യമായാണ് വിഷ്വല്‍ ഇഫക്ടിനുള്ള പുരസ്‌കാരം ഉള്‍പ്പെടുത്തുന്നത്. അതിലേക്കാണ് വെള്ളമുണ്ട മൊതക്കര അശ്വതി നിവാസില്‍ സുമേഷ് ഗോപാല്‍ അര്‍ഹത നേടിയിരിക്കുന്നത്. തിരുവനന്തപുരം നിശാഗന്ധിയില്‍ നടന്ന 51-ാമത് അന്താരാഷ്ട്ര ചലച്ചിത്രമേളയുടെ സമാപന വേദിയില്‍ വച്ച് മുഖ്യമന്ത്രി പിണറായി വിജയന്‍ പുരസ്‌കാരം നല്‍കും. ഖാലിദ് റഹ്മാന്‍ സംവിധാനം ചെയ്ത 'ലവ്' എന്ന സിനിമയിലെ വിഷ്വല്‍ ഇഫക്ടിനാണ് പുരസ്‌കാരം. ആഷിഖ് ഉസ്മാന്റെനാണ് ചിത്രം നിര്‍മിച്ചിരിക്കുന്നത്. സിനിമയിലെ സാങ്കേതികതയുടെ പിന്നണിയില്‍ പ്രവര്‍ത്തിച്ച ഡിജി ബ്രിക്സ് എന്റര്‍ടെയിന്‍മെന്റ് ഡയറക്ടര്‍മാരായ സുമേഷ് ഗോപാലും പാലക്കാട് നൂറണി സ്വദേശി അനീഷ് ദയാനന്ദനും പുരസ്‌കാരം ഏറ്റുവാങ്ങി. 'ലവ്' എന്ന ചിത്രത്തിലെ കഥാപാത്രത്തിന്റെ മാനസികാവസ്ഥയെ പ്രതിഫലിപ്പിക്കുന്നവിധമാണ് വിഷ്വല്‍ സാങ്കേതികതയെ ഉപയോഗപ്പെടുത്തിയിരിക്കുന്നത്. ഷൈന്‍ ടോം ചാക്കോയും രജിഷാ വിജയനും അഭിനയിച്ച ചിത്രം പ്രമേയം കൊണ്ടും മുന്‍പ് ശ്രദ്ധനേടിയിരുന്നതാണ്. മലയാളം, ഹിന്ദി, തമിഴ് ഭാഷകളിലായുള്ള എണ്‍പതിലധികം സിനിമകളില്‍ ഡിജി ബ്രിക് എന്റര്‍ടൈയിന്‍മെന്റ് സിനിമകള്‍ക്ക് വിഷ്വല്‍ ഇഫക്ട്‌സ് ചെയ്തിട്ടുണ്ട്. 'കനകം കാമിനി കലഹം', 'എല്ലാം ശരിയാകും', 'ആറാട്ട്' എന്നീ സിനിമകളിലും ഡിജി ബ്രിക് എന്റര്‍ടൈയിന്‍മെന്റ് വിഷ്വല്‍ ഇഫക്ട്‌സ് ഒരുക്കിയിട്ടുണ്ട്. കൂടാതെ ഇനി പ്രദര്‍ശനത്തിന് കാത്തിരിക്കുന്ന 'സല്യൂട്ട്', 'ഭീഷ്മ പര്‍വം', 'തല്ലുമാല' തുടങ്ങിയ പുതിയ ചിത്രങ്ങളിലും ഇവരുടെ ദൃശ്യ സാങ്കേതിയുടെ കയ്യൊപ്പ് പതിഞ്ഞിട്ടുണ്ട്. കേരളത്തിലെ ദ്യശ്യസാങ്കേതിക സംഘടനയായ വെക്‌സപയില്‍ അംഗമാണ് സുമേഷ്.