മാര്‍വലിന്റെ ബെസ്റ്റ്; ‘നോ വേ ഹോമിനെ’ ഏറ്റെടുത്ത് സോഷ്യല്‍ മീഡിയ

ലോക സിനിമാപ്രേമികള്‍ ഒരേപോലെ കാത്തിരുന്ന ചിത്രം 'സ്പൈഡര്‍മാന്‍: നോ വേ ഹോം' റിലീസ് ചെയ്തിരിക്കുകയാണ്. മികച്ച പ്രതികരണമാണ് സിനിമ നേടിക്കൊണ്ടിരിക്കുന്നത്. സ്പൈഡര്‍മാന്‍ എന്ന കഥാപാത്രത്തിന്റെ ഒരു ആഘോഷം തന്നെയാണ് സിനിമ എന്ന് പലരും അഭിപ്രായപ്പെടുന്നു. മാര്‍വല്‍ സിനിമാറ്റിക്ക് യൂണിവേഴ്സിന്റെ ഏറ്റവും മികച്ച ചിത്രം എന്നും സോഷ്യല്‍ മീഡിയയിലൂടെ പലരും പറയുന്നുണ്ട്. കേരളത്തിലും ചിത്രത്തിന് മികച്ച പ്രതികരണമാണ് ലഭിക്കുന്നത്. അഡ്വാന്‍സ് സെയിലില്‍ നിന്നു മാത്രമായി കേരളത്തില്‍ നിന്നും ചിത്രം ഒരു കോടിയ്ക്ക് മുകളില്‍ സ്വന്തമാക്കി എന്നാണ് റിപ്പോര്‍ട്ടുകള്‍. 'സ്പൈഡര്‍മാന്‍:ഫാര്‍ ഫ്രം ഹോം' അവസാനിക്കുന്നതിന്റെ തുടര്‍ച്ചയാണ് നോ വേ ഹോം. യഥാര്‍ഥ സ്പൈഡര്‍മാന്‍ പീറ്റര്‍ പാര്‍ക്കര്‍ ആണെന്ന വെളിപ്പെടുത്തലോടെയാണ് സ്പൈഡര്‍മാന്‍: ഫാര്‍ ഫ്രം ഹോം അവസാനിക്കുന്നത്. തന്റെ ഐഡന്റിറ്റി രഹസ്യമായി തന്നെ നിലനിര്‍ത്താന്‍ സ്പൈഡര്‍മാന്‍ ഡോക്ടര്‍ സ്ട്രെയ്ഞ്ചിന്റെ സഹായം തേടുന്നതും തുടര്‍ന്നുള്ള സംഭവ വികാസങ്ങളുമാണ് സ്പൈഡര്‍മാന്‍: നോ വേ ഹോമിന്റെ പ്രമേയം. ജോണ്‍ വാട്സ് സംവിധാനം ചെയ്യുന്ന ചിത്രം മാര്‍വല്‍ സ്റ്റുഡിയോസും കൊളമ്പിയ പിക്ചേഴ്സും ചേര്‍ന്നാണ് നിര്‍മ്മിക്കുന്നത്. സോണി പിക്ചേഴ്സ് റിലീസിംഗാണ് വിതരണം. . ഹിന്ദി, ഇംഗ്ലീഷ്, തമിഴ്, തെലുങ്ക് എന്നീ ഇന്ത്യന്‍ പ്രാദേശിക ഭാഷകളില്‍ സ്പൈഡര്‍മാന്‍: നോ വേ ഹോം റിലീസ് ചെയ്തിട്ടുണ്ട്.