‘മുറിവുകളും വേദനകളും’; ‘കടുവ’യുടെ ആക്ഷന്‍ രംഗങ്ങളെക്കുറിച്ച് പൃഥ്വിരാജ്

സിനിമക്കൊപ്പം സാമൂഹിക മാധ്യമങ്ങളിലും സജീവമായ താരമാണ് പൃഥ്വിരാജ്. തന്റെ പുതിയ ചിത്രം 'കടുവ'യുടെ വിശേഷങ്ങളും താരം പങ്കുവക്കാറുണ്ട്. ഇപ്പോള്‍ ഷൂട്ടിങ്ങിനിടെ തനിക്ക് മുറിവേറ്റതിന്റെ ഫോട്ടോയാണ് പൃഥ്വി പങ്കുവച്ചരിക്കുന്നത്. 'മുറിവുകളും വേദനകളും. ഒരു ആക്ഷന്‍ സിനിമ എങ്ങനെയെന്ന് മറന്നു തുടങ്ങിയിരുന്നു. അതിലേക്ക് തിരിച്ചെത്തിയിരിക്കുന്നു'. എന്നാണ് പൃഥ്വി കുറിച്ചത്. രാത്രി ഷൂട്ട് ആണെന്നും താരം വ്യക്തമാക്കുന്നു. കനല്‍ കണ്ണനാണ് ചിത്രച്ചിന്റെ ആക്ഷന്‍ ഡയറക്ടര്‍. അടുത്തിടെ കടുവക്ക് വേണ്ടി മസിലും പെരുപ്പിച്ചുള്ള ചിത്രം താരം പങ്കുവച്ചിരുന്നു. ഷാജി കൈലാസ് സംവിധാനം ചെയ്യുന്ന ചിത്രം ഒരു മാസ് എന്റര്‍ടെയ്നറാണ്. ഷാജി കൈലാസ് എട്ട് വര്‍ഷത്തിന് ശേഷം സംവിധാന രംഗത്തേയ്ക്ക് മടങ്ങിയെത്തുന്ന ചിത്രം എന്ന പ്രത്യേകതയും കടുവയ്ക്കുണ്ട്.വിവേക് ഒബ്റോയാണ് ചിത്രത്തിലെ പ്രധാന വില്ലന്‍ കഥാപാത്രത്തെ അവതരിപ്പിക്കുന്നത്. ജിനു എബ്രാഹാമാണ് കടുവയുടെ തിരക്കഥയൊരുക്കിയിരിക്കുന്നത്. മാജിക്ക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനും പൃഥ്വിരാജ് പ്രൊഡക്ഷന്‍സിന്റെ ബാനറില്‍ സുപ്രിയ മേനോനും ചേര്‍ന്നാണ് ചിത്രം നിര്‍മ്മിക്കുന്നത്. ബ്രോ ഡാഡി, തീര്‍പ്പ്, ജനഗണമന തുടങ്ങി നിരവധി ചിത്രണങ്ങളാണ് പൃഥ്വിരാജിന്റെതായി അണിയറയില്‍ ഒരുങ്ങുന്നത്.