രണ്‍ബീറിന്റെ ബിഗ് ബജറ്റ് ചിത്രം ‘ബ്രഹ്മാസ്ത്ര’; ദക്ഷിണേന്ത്യന്‍ പതിപ്പുകള്‍ എത്തിക്കാന്‍ രാജമൗലി

രണ്‍ബീര്‍ കപൂര്‍, അമിതാഭ് ബച്ചന്‍, അലി ആബട്ട് എന്നിവര്‍ കേന്ദ്ര കഥാപാത്രങ്ങളാകുന്ന ബിഗ് ബജറ്റ് ചിത്രം ബ്രഹ്മാസ്ത്ര' കഴിഞ്ഞ ദിവസം അന്നൗന്‍സ് ചെയ്തിരുന്നു. ഇപ്പോഴിതാ സിനിമയുടെ ദക്ഷിണേന്ത്യന്‍ വിതരണാവകാശം എസ് എസ് രാജമൗലി ഏറ്റെടുത്തിരിക്കുകയാണ്. ഹിന്ദിയ്ക്ക് പുറമെ തമിഴ്, തെലുങ്ക്, കന്നഡ, മലയാളം ഭാഷകളിലാണ് ചിത്രം എത്തുന്നത്. 'ലോകമെമ്പാടുമുള്ള നാല് ദക്ഷിണേന്ത്യന്‍ ഭാഷകളില്‍ ബ്രഹ്മാസ്ത്രം പ്രേക്ഷകര്‍ക്കായി അവതരിപ്പിക്കുന്നതില്‍ എനിക്ക് സന്തോഷമുണ്ട്. ബ്രഹ്മാസ്ത്രം എന്ന ആശയം സവിശേഷമാണ്, അത് അതിന്റെ കഥയിലും അവതരണത്തിലും പ്രതിഫലിക്കുന്നു. പല തരത്തില്‍, അത് എന്നെ ബാഹുബലിയെ ഓര്‍മ്മിപ്പിക്കുന്നു. സ്‌നേഹത്തിന്റെയും അഭിനിവേശത്തിന്റെയും അധ്വാനമാണ് സിനിമ. ബാഹുബലിക്ക് വേണ്ടി ഞാന്‍ ചെയ്തതുപോലെ, ബ്രഹ്മാസ്ത്രം നിര്‍മ്മിക്കാന്‍ അയന്‍ സമയം ചെലവഴിക്കുന്നത് ഞാന്‍ കണ്ടിട്ടുണ്ട്. ആധുനിക സാങ്കേതികവിദ്യയും, അത്യാധുനിക വിഎഫ്എക്സും ഉപയോഗിച്ച് പുരാതന ഇന്ത്യന്‍ സംസ്‌കാരത്തില്‍ നിന്നുള്ള പ്രമേയങ്ങളെ സിനിമ ഭംഗിയോടെ സംയോജിപ്പിക്കുന്നു! എനിക്ക് മനസിലാക്കാന്‍ കഴിയുന്ന ഒരു ചലച്ചിത്ര നിര്‍മ്മാണ യാത്രയാണ് ബ്രഹ്മാസ്ത്ര', രാജമൗലി പറഞ്ഞു. അയന്‍ മുഖര്‍ജിയാണ് ചിത്രം സംവിധാനം ചെയ്യുന്നത്. ഫോക്സ് സ്റ്റാര്‍ സ്റ്റുഡിയോസ്, ധര്‍മ്മ പ്രൊഡക്ഷന്‍സ്, പ്രൈം ഫോക്കസ്, സ്റ്റാര്‍ലൈറ്റ് പിക്ചേഴ്സ് എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. നാഗാര്‍ജുന അക്കിനേനി, മൗനി റോയ് എന്നിവരും സിനിമയില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. 2022 സെപ്തംബര്‍ 9ന് ചിത്രം റിലീസ് ചെയ്യും.