മൂന്നാര്‍ മൈനസ് ഒന്നില്‍; ‘കിടിലന്‍’ കാലാവസ്ഥ

മൂന്നാര്‍: ഈ സീസണില്‍ ആദ്യമായി മൂന്നാറില്‍ താപനില മൈനസ് ഡിഗ്രിയില്‍ എത്തി. കണ്ണന്‍ദേവന്‍ കമ്പനിയുടെ ചെണ്ടുവര എസ്റ്റേറ്റിലാണ് ബുധനാഴ്ച രാവിലെ താപനില മൈനസ് ഒന്ന് രേഖപ്പെടുത്തിയത്.ഇതേ തുടര്‍ന്ന് ചെണ്ടുവരയില്‍ മഞ്ഞുവീഴ്ചയും ശക്തമായി. ഇതുകാരണം കമ്പനിയുടെ ഏക്കറുകണക്കിന് സ്ഥലത്തെ തേയിലച്ചെടികള്‍ക്ക് നാശമുണ്ടായിട്ടുണ്ട്. മൂന്നാര്‍ ടൗണ്‍, നല്ലതണ്ണി, മാട്ടുപ്പട്ടി എന്നിവിടങ്ങളില്‍ മൂന്ന് ഡിഗ്രിയായിരുന്നു താപനില. സൈലന്റ്വാലിയില്‍ ഒരു ഡിഗ്രി. തെന്‍മലയില്‍ എട്ടും, കന്നിമലയില്‍ ആറും, സെവന്‍മലയില്‍ നാലും ചിറ്റുവരയില്‍ അഞ്ചു ഡിഗ്രിയുമായിരുന്നു ബുധനാഴ്ച രാവിലത്തെ താപനില. മൂന്നാറില്‍ പകല്‍ താപനില 26 വരെയാണ് അനുഭവപ്പെടുന്നത്. ഈ സീസണില്‍ കഴിഞ്ഞ ഡിസംബര്‍ 16 മുതല്‍ 20 വരെ മൂന്നാറില്‍ താപനില മൂന്നു ഡിഗ്രി വരെയെത്തിയിരുന്നു. ചെണ്ടുവരയില്‍ താപനില മൈനസില്‍ എത്തിയതോടെ വരും ദിവസങ്ങളില്‍ മറ്റ് എസ്റ്റേറ്റുകളിലും താപനില മൈനസില്‍ എത്തുമെന്നാണ് പ്രതീക്ഷ.വരും ദിവസങ്ങളില്‍ തണുപ്പാസ്വദിക്കാനായി കൂടുതല്‍ വിനോദ സഞ്ചാരികളെത്തിയേക്കും.