പ്രായപൂര്‍ത്തിയാവാത്ത മകളെ പീഡിപ്പിച്ചു, 5 ലക്ഷം തട്ടിയെടുത്തു; പിതാവ് അറസ്റ്റില്‍

പ്രായപൂര്‍ത്തിയാവാത്ത മകളെ പീഡിപ്പിച്ചതിനു പിന്നാലെ, സര്‍ക്കാര്‍ സഹായം ലഭിച്ച അഞ്ചു ലക്ഷം രൂപ തട്ടിയെടുക്കുകയും ചെയ്ത കേസില്‍ പിതാവ് അറസ്റ്റില്‍. മൈസൂര്‍ ജില്ലയിലെ ഹുന്‍സൂര്‍ താലൂക്കിലാണ് സംഭവം. പീഡനക്കേസില്‍ ജാമ്യത്തിലിറങ്ങിയ പിതാവിനെ, സര്‍ക്കാര്‍ സഹായം തട്ടിയെടുത്ത സംഭവത്തില്‍ പൊലീസ് അറസ്റ്റ് ചെയ്യുകയായിരുന്നു. ആദിവാസി വിഭാഗത്തില്‍പ്പെട്ട ഇയാളെ 2019ല്‍ കൗമാരക്കാരിയായ മകളെ പീഡിപ്പിച്ച കേസില്‍ പോക്‌സോ വകുപ്പ് പ്രകാരമാണ് അറസ്റ്റ് ചെയ്തത്. പീഡനത്തിനിരയായ പെണ്‍കുട്ടിക്ക് കര്‍ണാടക സര്‍ക്കാര്‍ 5 ലക്ഷം രൂപ 2020ല്‍ നഷ്ടപരിഹാരം അനുവദിച്ചു. ഈ തുക പെണ്‍കുട്ടിയുടെ ബാങ്ക് അക്കൗണ്ടില്‍ നിക്ഷേപിക്കുകയും ചെയ്തു. ഇതിനിടെ ജാമ്യത്തിലിറങ്ങിയ പ്രതി ഭാര്യയെ സമീപിച്ച് അഞ്ച് ലക്ഷം രൂപ അക്കൗണ്ടിലേക്ക് മാറ്റി നല്‍കാമെന്ന് തെറ്റിദ്ധരിപ്പിച്ചു. എന്നാല്‍ പെണ്‍കുട്ടിയുടെ അമ്മ ബാങ്കിലെത്തി അന്വേഷിച്ചപ്പോള്‍ തട്ടിപ്പ് മനസ്സിലായി. ഇവര്‍ പൊലീസില്‍ പരാതിപ്പെട്ടതിനു പിന്നാലെ പെണ്‍കുട്ടിയുടെ പിതാവിനെ ഹുന്‍സൂര്‍ പൊലീസ് അറസ്റ്റ് ചെയ്തു.