മോഷ്ടിച്ച പണത്തിലെ പങ്ക് പാവങ്ങള്‍ക്ക്; ബെംഗളൂരുവില്‍ ‘റോബിന്‍ഹുഡ് സ്‌റ്റൈല്‍’ മോഷ്ടാവ് പിടിയില്‍

ഒരോ മോഷണത്തിനുശേഷവും വേളാങ്കണ്ണിയിലെയും മൈസൂരുവിലെയും പള്ളികള്‍ക്ക് സമീപമുള്ള യാചകര്‍ക്ക് പണ വിതരണം... കൈയില്‍ എപ്പോഴും ബൈബിള്‍... കഴിഞ്ഞദിവസം ബെംഗളൂരു പോലീസിന്റെ പിടിയിലായ ജോണ്‍ മെല്‍വിന്‍ (46) എന്ന മോഷ്ടാവിന്റേതാണ് വ്യത്യസ്തമായ ഈ രീതികള്‍. പണക്കാരുടെ വീട്ടില്‍നിന്ന് മോഷണം നടത്തി പാവപ്പെട്ടവര്‍ക്ക് വിതരണം ചെയ്യുന്ന 'റോബിന്‍ഹുഡ്' ശൈലിയിലുള്ള മോഷ്ടാവിനെ വിജയനഗറിലെ സര്‍ക്കാര്‍ ഉദ്യോഗസ്ഥന്റെ വീട്ടില്‍ നടന്ന മോഷണവുമായി ബന്ധപ്പെട്ടാണ് പോലീസ് പിടികൂടിയത്. ജാലഹള്ളിക്ക് സമീപത്ത് ഇടിഞ്ഞുപൊളിഞ്ഞ കെട്ടിടത്തില്‍ ഒറ്റയ്ക്കായിരുന്നു ഇയാളുടെ താമസം. സംസ്ഥാനത്തിന്റെ വിവിധ ഭാഗങ്ങളിലായി നടന്ന അന്പതോളം മോഷണങ്ങളില്‍ ജോണ്‍ മെല്‍വിന് പങ്കുണ്ടെന്നാണ് പോലീസിന്റെ കണ്ടെത്തല്‍. 1994-ലായിരുന്നു ആദ്യ മോഷണം. തുടര്‍ന്ന് നടത്തിയ മോഷണങ്ങള്‍ക്കിടയില്‍ ഒരിക്കല്‍പോലും പിടിക്കപ്പെട്ടില്ല. രാഷ്ട്രീയക്കാരുടെയും സമ്പന്നരുടെയും വീടുകളില്‍മാത്രമാണ് ഇയാള്‍ മോഷണം നടത്തിയിരുന്നത്. ആവശ്യമായ പണവും ആഭരണങ്ങളും മാത്രമെടുക്കുന്നതായിരുന്നു പതിവ്. മോഷ്ടിക്കപ്പെട്ടവയില്‍ കള്ളപ്പണവും ഉണ്ടായിരുന്നതിനാല്‍ ചിലയിടങ്ങളില്‍നിന്ന് പരാതികളുമുണ്ടായിരുന്നില്ല. ഒരു ഭാഗം പാവപ്പെട്ടവര്‍ക്കുവേണ്ടി മാറ്റിവെച്ചതിനുശേഷം ബാക്കിയുള്ള തുക സ്പാകളില്‍നിന്ന് മസാജ് ചെയ്യാനും സുഭിക്ഷമായി ഭക്ഷണം കഴിക്കാനുമാണ് ഉപയോഗിച്ചിരുന്നത്. കൈവശമുള്ള തുക തീരുന്നതിനനുസരിച്ച് വീണ്ടും മോഷണത്തിനിറങ്ങും. പോലീസുകാരുടെ വീടുകളിലും കയറിയിട്ടുണ്ടെങ്കിലും വീട് പോലീസിന്റേതാണെന്ന് തിരിച്ചറിഞ്ഞതോടെ സാധനങ്ങള്‍ തിരികെവെച്ചിട്ടുണ്ടെന്നും ഇയാള്‍ മൊഴി നല്‍കി.