‘ദളപതി 65’ ല്‍ വിജയ്ക്കൊപ്പമെത്തുന്നത് വമ്പൻ താരനിരയെന്ന് റിപ്പോര്‍ട്ട്‌

പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന വിജയ് ചിത്രമാണ് 'ദളപതി 65'. സണ്‍ പ്രൊഡക്ഷന്‍സ് ബാനറില്‍ കലാനിധി മാരന്‍ ആണ് ചിത്രം നിര്‍മ്മിക്കുന്നത്. എ ആര്‍ മുരുഗദോസ് ആയിരുന്നു ചിത്രം സംവിധാനം ചെയ്യാനായി ആദ്യം മുന്നോട്ടുവന്നത്.

എന്നാല്‍ പിന്നീട് പല കാരണങ്ങള്‍ കൊണ്ട് അദ്ദേഹം ചിത്രത്തില്‍ നിന്നും പിന്‍വാങ്ങുകയായിരുന്നു. പിന്നീട് നെല്‍സണ്‍ ദിലീപ്കുമാറിന്റെ പേരാണ് സംവിധായകനായി ഉയര്‍ന്ന് കേട്ടത്.

നെല്‍സണ്‍ സംവിധാനം ചെയ്ത ഒരു ചിത്രം മാത്രമാണ് റിലീസ് ചെയ്തിട്ടുള്ളത്. നയന്‍താര കേന്ദ്രകഥാപാത്രത്തെ അവതരിപ്പിച്ച കോലമാവ് കോകില ആണ് നെല്‍സണ്‍ സംവിധാനം ചെയ്ത ആദ്യ ചിത്രം.മികച്ച പ്രതികരണമായിരുന്നു ചിത്രത്തിന് ലഭിച്ചത്.

ഇപ്പോഴിത ദളപതി 65 നെ കുറിച്ചുളള സുപ്രധാന വിവരം പുറത്തു വന്നിരിക്കുകയാണ്. ചിത്രത്തില്‍ വിജയ്ക്ക് നായികയായി എത്തുന്നത് ബോളിവുഡ് താരസുന്ദരി ദീപിക പദുകോണാണത്രേ. എന്നാല്‍ ഇതു സംബന്ധമായ ഔദ്യാഗിക പ്രഖ്യാപാനം ഇതുവരെയുണ്ടായിട്ടില്ല. പ്രചരിക്കുന്ന റിപ്പോര്‍ട്ട് സത്യമാണെങ്കില്‍ ദീപിക അഭിനയിക്കുന്ന ആദ്യ തെന്നിന്ത്യന്‍ ചിത്രമാകും ഇത്.

ചിത്രത്തില്‍ വിജയ്ക്ക് രണ്ട് നായികമാരുണ്ടാകുമെന്ന് നേരത്തെ റിപ്പോര്‍ട്ടുകളുണ്ടായിരുന്നു. അതിലൊരാള്‍ മലയാളി താരമായ മഡോണ സെബാസ്റ്റ്യന്‍ ആണ്. തെന്നിന്ത്യന്‍ നടിമാരായ കാജല്‍ അഗര്‍വാള്‍, പൂജ ഹെഗ്‌ഡെ എന്നിവരുടെ പേരുകള്‍ ഉയര്‍ന്നു വന്നിരുന്നു.

ദീപിക പദുകോണ്‍ മാത്രമല്ല ചിത്രത്തില്‍ മറ്റൊരു സര്‍പ്രൈസ് കൂടിയുണ്ട്. ദളപതി 65 ല്‍ വിജയ് യുടെ വില്ലനായി എത്തുന്നത് ബോളിവഡ് താരം ജോണ്‍ എബ്രഹാമാണെന്നും റിപ്പോര്‍ട്ടുകള്‍ പ്രചരിക്കുന്നുണ്ട്. ദീപികയെ പോലെ മലയാളത്തില്‍ ജോണിനും കൈനിറയെ ആരാധകരുണ്ട് .

അതേസമയം ഇതിനെ കുറിച്ചു ഔദ്യാഗിക പ്രഖ്യാപനം ഉണ്ടായിട്ടില്ല. പുറത്തു വന്ന റിപ്പോര്‍ട്ടുകള്‍ ശരിയാണെങ്കില്‍ ഒരു മാസ് ക്ലാസ് ചിത്രമായിരിക്കും ദളപതി 65.വിജയ്യുടെ അറുപത്തിയഞ്ചാമതു ചിത്രം സൂപ്പര്‍ ഹിറ്റായ വിജയ്- എ ആര്‍ മുരുഗദോസ് ടീമിന്റെ തുപ്പാക്കിയുടെ രണ്ടാം ഭാഗം ആയിരിക്കും എന്ന് നേരത്തെ വാര്‍ത്തകള്‍ പ്രചരിച്ചിരുന്നു. എന്നാല്‍ അത് നിഷേധിച്ച് അണിയറ പ്രവര്‍ത്തകര്‍ രംഗത്തെത്തിയിരുന്നു.