നൂറ് ദിവസം പിന്നിട്ട് ‘ബീസ്റ്റ്’ ഷൂട്ടിംഗ്; ആഘോഷവുമായി ഇളയ ദളപതി

വിജയ് യുടെപുതിയ ചിത്രം 'ബീസ്റ്റി'ന്റെ ഫസ്റ്റ്‌ലുക്കിന് പിന്നാലെ ദളപതിയുടെ സിനിമ വിശേഷങ്ങള്‍ക്കായി ആരാധകര്‍ സോഷ്യല്‍ മീഡിയയില്‍ കാത്തിരിക്കുകയാണ്. ഇപ്പോള്‍ ബിസ്റ്റിന്റെ ചിത്രീകരണം നൂറ് ദിവസം പിന്നിട്ടതിന്റെ സന്തോഷം കൂടി പങ്കു വച്ചിരിക്കുകയാണ് സംവിധായകനും തിരക്കഥാകൃത്തുമായ നെല്‍സണ്‍ ദിലീപ് കുമാര്‍. ഷൂട്ടിംഗ് ലൊക്കേഷനില്‍ നിന്നുള്ള ചിത്രം പങ്കുവച്ചു കൊണ്ടായിരുന്നു നെല്‍സണ്‍ ചിത്രീകരണം നൂറ് ദിവസം പിന്നീട്ടുവെന്ന വാര്‍ത്ത സോഷ്യല്‍ മീഡിയയില്‍ അറിയിച്ചത്. ഒരു ഡ്രംസിന് മുന്നില്‍ ഇരിക്കുന്ന വിജയിയെയും പാട്ട് പാടിക്കൊണ്ട് നില്‍ക്കുന്ന നായിക പൂജ ഹെഗ്‌ഡെയെയുടെയും ചിത്രമാണ് പങ്കു വച്ചത്. പുതിയ ചിത്രം പുറത്തുവിട്ടു നിമിഷങ്ങള്‍ കൊണ്ട് തന്നെ ആരാധകരും സോഷ്യല്‍ മീഡിയകളും ഏറ്റെടുത്തു കഴിഞ്ഞു. വിജയ്യുടെ സിനിമാ ജീവിതത്തിലെ 65മത്തെ ചിത്രമാണ് 'ബീസ്റ്റ്' എന്നതുകൊണ്ട് തന്നെ 'ദളപതി 65' എന്നാണ് ചിത്രം അറിയിപ്പെടുന്നത്. സണ്‍ പിക്‌ചേഴ്‌സ് ആണ് ചിത്രം നിര്‍മിക്കുന്നത്. അനിരുദ്ധ് രവിചന്ദര്‍ ആണ് ചിത്രത്തിന്റെ സംഗീത സംവിധായകന്‍. മലയാളി താരങ്ങളായ ഷൈന്‍ ടോം ചാക്കോയും അപര്‍ണ ദാസും ചിത്രത്തില്‍ എത്തുന്നുണ്ട്. സംവിധായകന്‍ ശെല്‍വരാഘവനും ബീസ്റ്റെന്ന ചിത്രത്തില്‍ അഭിനയിക്കുന്നുണ്ട്. ഷൈന്‍ ആദ്യമായിട്ടാണ് തമിഴ് ചിത്രത്തില്‍ അഭിനയിക്കുന്നത്. മൂന്ന് പ്രതിനായകന്‍മാരാണ് ചിത്രത്തില്‍ ഉള്ളത്. പ്രേക്ഷകര്‍ക്ക് ഏറെ പ്രതീക്ഷയുള്ള ചിത്രമായ ബീസ്റ്റ് അടുത്ത വര്ഷം തന്നെ പ്രദര്‍ശനം ഉണ്ടാകുമെന്നാണ് വിവരങ്ങള്‍. സണ്‍ പിക്ച്ചേഴ്സുമായി വിജയ്യുടെ നാലാമത്തെ ചിത്രമാണ് 'ബീസ്റ്റ്'. വേട്ടയ്കാരന്‍, സുറ, സര്‍ക്കാര്‍ എന്നീ ചിത്രങ്ങളാണ് ഇതിന് മുമ്പ് സണ്‍ പിക്ച്ചേഴ്സ് നിര്‍മ്മിച്ച വിജയ് ചിത്രങ്ങള്‍.