ഭിന്നലിംഗ വിഭാഗത്തിലെ ആദ്യ എസ്.ഐ ചുമതലയേറ്റു

രാജ്യത്ത ഭിന്നലിംഗ വിഭാഗത്തിലെ ആദ്യ പോലീസ് ഇന്‍സ്‌പെക്ടര്‍ ചുമതലയേറ്റു. കെ.പ്രഗതി യാഷിനിയാണ് ചരിത്രത്തിന്റെ ഭാഗമായത്. ഞായറാഴ്ചയാണ് ഇവര്‍ ചുമതലയേറ്റത്. തമിഴ്‌നാട്ടിലെ വണ്ടലൂരിലെ പോലീസ് അക്കാദമിയില്‍ ഒരു വര്‍ഷം പരിശീലനത്തിനു ശേഷമാണ് പ്രഗതിക്ക് ധര്‍മ്മപുരി പോലീസ് സ്‌റ്റേഷനില്‍ നിയമനം ലഭിച്ചിരിക്കുന്നത്.

പോലീസ് സേനയില്‍ ചേരുന്നതിന് വര്‍ഷങ്ങളായി നിയമപോരാട്ടത്തിലായിരുന്നു പ്രഗതി യാഷിനി. ജോലിയിലെ ആദ്യ ദിനം വളരെ ആവേശകരമായിരുന്നു. തന്റെ മേലുദ്യോഗസ്ഥരും സഹപ്രവര്‍ത്തകനും തനിക്ക് നല്ല പിന്തുണയാണ് നല്‍കിയതെന്നും അവര്‍ പറഞ്ഞു. വെള്ളിയാഴ്ചയാണ് വണ്ടലൂരിലെ പോലീസ് അക്കാദമിയില്‍ നിന്നും പ്രഗതിയടക്കം 1028 പേര്‍ പരിശീലനം പൂര്‍ത്തിയാക്കി ഇറങ്ങിയത്.

ചെന്നൈ സ്വദേശിയാണ് പ്രഗതി യാഷിനി. പ്രദീപ് കുമാര്‍ എന്നായിരുന്നു ആദ്യ പേര്. കമ്പ്യൂട്ടര്‍ ആപ്ലിക്കേഷനില്‍ ബിരുദം പൂര്‍ത്തിയാക്കിയ ശേഷമാണ് ലിംഗമാറ്റ ശസ്ത്രക്രിയയ്ക്ക് വിധേയമാകുകയും പ്രഗതി എന്ന് പേരുമാറ്റിയതും. പോലീസ് സേനയില്‍ ചേരണമെന്ന പ്രഗതിയുടെ ആഗ്രഹത്തിന് വിലങ്ങുതടിയായി നിന്നത് ഏതു വിഭാഗത്തില്‍ ഉള്‍പ്പെടുത്തണമെന്നത് സംബന്ധിച്ച തര്‍ക്കമായിരുന്നു. നിയമപോരാട്ടത്തിനൊടുവില്‍ ഭിന്നലിംഗ വിഭാഗത്തിന് സേനയില്‍ പ്രവേശനം ലഭിച്ചത്.