രജനിയോ കമലോ ? സൂപ്പര്‍താരങ്ങളുടെ രാഷ്ട്രീയ പ്രവേശം ചര്‍ച്ച ചെയ്ത് തമിഴ്‌നാട്

രജനി കാന്തിന്റെയും കമല്‍ഹാസന്റെയും രാഷ്ട്രീയ പ്രവേശം സംബന്ധിച്ചുള്ള ചര്‍ച്ചകള്‍ പുരോഗമിക്കുന്നതിനിടയില്‍ കഴിഞ്ഞ ദിവസം ചെന്നൈയില്‍ ഇരുവരും ഒരേ വേദിയില്‍ ഒന്നിച്ചു. ഡിഎംകെ മുഖപത്രം മുരശൊലിയുടെ എഴുപത്തഞ്ചാം വാര്‍ഷികാഘോഷ ചടങ്ങിലാണ് ഇരുവരും ഒരുമിച്ച് പങ്കെടുത്തത്. വേദിയില്‍ സൂപ്പര്‍താരങ്ങളുടെ രാഷ്ട്രീയ പ്രവേശം സംബന്ധിച്ച ചില പരാമര്‍ശങ്ങള്‍ ഉയരുകയും ചെയ്തു. 1983 ല്‍ ഡിഎംകെയില്‍ ചേരാന്‍ ആവശ്യപ്പെട്ടുകൊണ്ട് കരുണാനിധി തനിക്ക് ടെലിഗ്രാം അയച്ചത് കമല്‍ ചടങ്ങില്‍ അനുസ്മരിച്ചു. അതിനിതുവരെ താന്‍ മറുപടി പറഞ്ഞിട്ടില്ലെന്നു മാത്രമല്ല ഡിഎംകെയെ പല തവണ വിമര്‍ശിക്കുകയും ചെയ്തിരുന്നതായി പറഞ്ഞു.

കമലിന്റെ പ്രസംഗം നടക്കുമ്പോള്‍ സദസ്സിന്റെ മുന്‍ നിരയില്‍ തന്നെയുണ്ടായിരുന്നു രജനീകാന്ത്. പിന്നീട് ഡിഎംകെ വര്‍ക്കിംഗ് പ്രസിഡന്റ് എംകെ സ്റ്റാലിന്‍ രജനിയെ വേദിയിലേക്ക് വിളിച്ചു കയറ്റുകയും രജനി കമലിനൊപ്പം വേദി പങ്കിടുകയും ചെയ്തു. ഡിഎംകെ വേദിയില്‍ എത്തിയത് കരുണാനിധിയോടുള്ള അടുപ്പം കൊണ്ടാണെന്നും അതിനെ ഡിഎംകെ പ്രവേശമായി കണക്കാക്കേണ്ടതില്ലെന്നുമാണ് രജനി കേന്ദ്രങ്ങള്‍ പറയുന്നത്.