അമൃത ജയലളിതയുടെ മകള്‍ ; സുഹൃത്തിന്റെ വെളിപ്പെടുത്തല്‍

അന്തരിച്ച തമിഴ്‌നാട് മുന്‍ മുഖ്യമന്ത്രി ജെ. ജയലളിതയുടെ മകളാണെന്ന് അവകാശപ്പെട്ട് വന്ന അമൃത ജയയുടെ മകള്‍ തന്നെയെന്ന് സാക്ഷ്യപ്പെടുത്തി ജയലളിതയുടെ അടുത്ത് സുഹൃത്ത് കെ.എസ് ഗീത. താന്‍ ജയലളിതയുടെ മകളാണെന്ന് തെളിയിക്കുന്നതിന് ഡി.എന്‍.എ ടെസ്റ്റ് നടത്തണമെന്നായിരുന്നു ഇവരുടെ ആവശ്യം. ഇക്കാര്യം ആവശ്യപ്പെട്ട് സുപ്രീം കോടതിയെ സമീപിച്ച അമൃതയോട് കര്‍ണാടക ഹൈക്കോടതിയെ സമീപിക്കാനായിരുന്നു കോടതി നിര്‍ദ്ദേശം.

ജയലളിതയ്ക്ക് ഒരു മകള്‍ ഉള്ളതായി തനിക്ക് അറിയാമായിരുന്നെന്ന് ഗീത പറഞ്ഞു. എന്നാല്‍ മകള്‍ എവിടെയാണെന്ന് മനസിലാക്കാന്‍ സാധിച്ചിരുന്നില്ലെന്നും പ്രമുഖ തമിഴ് മാധ്യമത്തോട് ഗീത പറഞ്ഞു. നടന്‍ ശോഭന്‍ ബാബുവും അടുത്ത കുടുംബ സുഹൃത്താണ്. ഇത് സംബന്ധിച്ചും ജയലളിതയെക്കുറിച്ചും അദ്ദേഹം ഒരുപാട് കാര്യങ്ങള്‍ പറഞ്ഞിട്ടുണ്ടെന്നും ഗീത പറഞ്ഞു. താന്‍ ആരെയും തേടി പോയിട്ടില്ല. അമൃത തന്നെ തേടി വരികയായിരുന്നു. ജയലളിതയ്ക്ക് നീതി കിട്ടാന്‍ താന്‍ നടത്തുന്ന പോരാട്ടം ശ്രദ്ധയില്‍പ്പെട്ടാണ് അമൃത തന്റെ അടുത്തേക്ക് വന്നതെന്നും ഗീത പറഞ്ഞു.

നിരവധി കാര്യങ്ങള്‍ അമൃത പറഞ്ഞു. പെരിയമ്മ എന്നാണ് അവള്‍ ജയയെ വിളിച്ചിരുന്നത്. എന്നാല്‍ വൈകിയാണ് അവളും യാഥാര്‍ത്ഥ്യം മനസിലാക്കിയത്. ഡി.എന്‍.എ ടെസ്റ്റ് നടത്തിയാല്‍ സത്യം പുറത്ത് വരുമെന്നും ഗീത പറഞ്ഞു. ശശികലയോട് സംസാരിക്കരുതെന്ന് ജയലളിയത അമൃതയോട് പറഞ്ഞിരുന്നു. മറ്റ് ചില കാര്യങ്ങളും അവിടെ നടന്നിട്ടുണ്ട്. ഇക്കാര്യം ഡി.എന്‍.എ ടെസ്റ്റിന് ശേഷം പറയുമെന്നും ഗീത പറഞ്ഞു.