വിജയ് യുടെ ‘മാസ്റ്റർ’ കേരളത്തിലെത്തിക്കുന്നത് പൃഥ്വിരാജ്

വിജയ് ചിത്രം മാസ്റ്ററിന്റെ കേരളത്തിലെ വിതരണാവകാശം സ്വന്തമാക്കിയിരിക്കുകയാണ് പൃഥ്വിരാജ്. പൃഥ്വിരാജ് പ്രൊഡക്‌ഷന്‍സും നിര്‍മാതാവായ ലിസ്റ്റിന്‍ സ്റ്റീഫന്റെ മാജിക് ഫ്രെയിംസും ചേര്‍ന്നാണ് ചിത്രം കേരളത്തില്‍ പ്രദര്‍ശനത്തിനെത്തിക്കുക. നേരത്തെ വിജയ് ചിത്രമായ ബിഗിൽ കേരളത്തിലെത്തിച്ചതും ഇവരുടെ കൂട്ടുകെട്ടുതന്നെയായിരുന്നു.

'കൈതി'ക്ക് ശേഷം ലോകേഷ് കനകരാജ് രചനയും സംവിധാനവും നിര്‍വഹിക്കുന്ന ചിത്രമാണ് മാസ്റ്റര്‍. കൈദി താരം അര്‍ജുന്‍ ദാസ്, ശാന്തനു ഭാഗ്യരാജ്, ആന്‍ഡ്രിയ ജെര്‍മിയാഹ്, നാസര്‍, സഞ്ജീവ്, രമ്യ സുബ്രഹ്മണ്യന്‍ തുടങ്ങിയവരും ചിത്രത്തില്‍ മറ്റു പ്രധാന വേഷങ്ങളിലെത്തുന്നുണ്ട്.

എക്‌സ് ബി ഫിലിം ക്രിയേറ്റേഴ്‌സിന്‍റെ ബാനറില്‍ സേവ്യര്‍ ബ്രിട്ടോയാണ് ചിത്രം നിര്‍മ്മിക്കുന്നത്. സത്യന്‍ സൂര്യന്‍ ആണ് ഛായാഗ്രഹണം. അനിരുദ്ധ രവിചന്ദര്‍ ആണ് സംഗീതം.ചിത്രം പൊങ്കൽ റിലീസ് ആയി ജനുവരിയിൽ തിയറ്ററുകളിലെത്തിക്കാനാണ് നിർമാതാക്കൾ പദ്ധതിയിടുന്നത്.

സിനിമ ലോകം ഒന്നടങ്കം ഉറ്റുനോക്കുന്ന ഈ ചിത്രത്തിനു ലഭിക്കുന്ന പ്രേക്ഷക പ്രതികരണം അനുസരിച്ചിരിക്കായിരിക്കും പെട്ടിയിലിരിക്കുന്ന മറ്റ് മലയാളസിനിമകളുടെ ഭാവി തന്നെയെന്ന് പറയാം.

മുന്‍കാലങ്ങളില്‍ വിജയ് സിനിമകള്‍ക്ക് കേരളത്തിൽ കിട്ടുന്ന സ്വീകാര്യതയും കലക്‌ഷനും പരിഗണിച്ച് മാസ്റ്റർ തീയറ്റർ റിലീസ് ആകുന്നതോട് കൂടി ജനുവരിയില്‍ കേരളത്തിലെ തിയറ്ററുകളും തുറന്നേക്കും.