വ്യോമസേനയില്‍ ചേരാന്‍ കൊതിച്ചു, എത്തിപ്പെട്ടത് ബോളിവുഡില്‍; സുശാന്ത് വിട പറഞ്ഞിട്ട് രണ്ട് വര്‍ഷം

ബോളിവുഡ് നടന്‍ സുശാന്ത് സിംഗ് രജപുത്തിന്റെ ഓര്‍മദിനമാണിന്ന്. വിടപറഞ്ഞ് രണ്ട് വര്‍ഷം പിന്നിടുമ്പോഴും സുശാന്തിന്റെ മരണത്തില്‍ ദുരൂഹത തുടരുകയാണ്. ( sushant singh life story ) ബിഹാര്‍ സ്റ്റേറ്റ് ഹാന്‍ഡ്ലൂം കോര്‍പറേഷനിലെ ടെക്നിക്കല്‍ ഓഫിസറായ കൃഷ്ണ കുമാര്‍ സിംഗിന്റേയും ഭാര്യ ഉഷാ സിംഗിന്റേയും അഞ്ച് മക്കളില്‍ ഇളയവനായിരുന്നു സുശാന്ത്. ഗുല്‍ഷനെന്നായിരുന്നു സുശാന്തിന്റെ വിളിപ്പേര്. ആസ്ട്രോഫിസിക്സില്‍ അതീവ താത്പര്യമുണ്ടായിരുന്ന സുശാന്ത് ഫിസിക്സിലെ നാഷ്ണല്‍ ഒളിമ്പ്യാഡിലെ വിജയിയാണ്. ബഹിരാകാശ യാത്രികനാകാനും തുടര്‍ന്ന് എയര്‍ ഫോഴ്സ് പൈലറ്റാകാനും കൊതിച്ചിരുന്ന സുശാന്ത് കുടുംബത്തിന്റെ സമ്മര്‍ദത്തിന് വഴങ്ങിയാണ് ഡല്‍ഹി ടെക്നോളജിക്കല്‍ സര്‍വകലാശാലയില്‍ എഞ്ചിനിയറിംഗിന് ചേരുന്നത്. ഷാറുഖ് ഖാന്റെ കടുത്ത ആരാധകനായിരുന്ന സുശാന്ത് ബോളിവുഡില്‍ എത്തിച്ചേരുകയായിരുന്നു. നെപ്പോട്ടിസം അടക്കി വാഴുന്ന ബോളിവുഡില്‍ സിനിമാ പാരമ്പര്യമില്ലാത്ത കുടുംബങ്ങളില്‍ നിന്നുള്ള സാധാരണക്കാര്‍ക്കും എത്തിച്ചേരാന്‍ സാധിക്കുമെന്നും സ്വപ്രയത്നത്താല്‍ സ്വന്തം ഇടം കണ്ടെത്താനാകുമെന്നും തെളിയിച്ച വ്യക്തിയാണ് സുശാന്ത്. ടെലിവിഷന്‍ പരമ്പരകളിലൂടെയാണ് സുശാന്ത് സിംഗ് കലാരംഗത്ത് ശ്രദ്ധേയനായത്. പവിത്ര രിഷ്ത എന്ന പരമ്പര സുശാന്തിനെ പ്രേക്ഷകരുടെ പ്രിയങ്കരനാക്കി. 'ഝലക് ദിഖ്ലാ ജാ' എന്നൊരു ഡാന്‍സ് മത്സരത്തിലും സുശാന്ത് പങ്കെടുത്തു. പവിത്ര രിഷ്തയിലെ നായികയായിരുന്ന അങ്കിതയുമായി സുശാന്ത് ആറ് വര്‍ഷത്തോളം പ്രണയത്തിലായിരുന്നു. പിന്നീട് ഇരുവരും പിരിഞ്ഞു. 2019 ലാണ് റിയാ ചക്രബര്‍ത്തിയുമായി സുശാന്ത് പ്രണയത്തിലാകുന്നത്. ഇതിനിടെ ക്രിതി സനോണ്‍, സാറാ അലി ഖാന്‍ എന്നീ പേരുകളും സുശാന്തിനൊപ്പം ചേര്‍ത്ത് കേട്ടിരുന്നു. കൈപോ ചെ എന്ന ചിത്രത്തിലൂടെയാണ് ബോളിവുഡിലേക്കുള്ള അരങ്ങേറ്റം. മികച്ച നവാഗത നടനുള്ള ആ വര്‍ഷത്തെ ഫിലിം ഫെയര്‍ പുരസ്‌കാരവും ചിത്രത്തിലൂടെ സുശാന്ത് സ്വന്തമാക്കി. ശുദ്ധ് ദേശി റൊമാന്‍സ്, ഡിറ്റക്ടീവ് ബ്യോംകേശ് ബക്ഷി എന്നീ ചിത്രങ്ങളും ശ്രദ്ധേയമായി. എം എസ് ധോണിയുടെ ജീവചരിത്ര സിനിമയായ 'എം എസ് ധോണി: ദ അണ്‍ടോള്‍ഡ് സ്റ്റോറി'യില്‍ ധോണിയെ അവതരിപ്പിച്ചത് സുശാന്ത് ആയിരുന്നു. കേദാര്‍നാഥ്, ചിച്ചോര്‍,പികെ എന്നീ ചിത്രങ്ങളും ഏറെ ശ്രദ്ധ നേടി. സിനിമയിലെത്തി ചുരുങ്ങിയ കാലം കൊണ്ട് തന്നെ ഒട്ടേറെ ആരാധകരെ സ്വന്തമാക്കാന്‍ സുശാന്തിന് കഴിഞ്ഞു. ഏഴുവര്‍ഷത്തെ സിനിമാ ജീവിതത്തില്‍ അവിസ്മരണീയമായ കഥാപാത്രങ്ങള്‍. ചെയ്തുതീര്‍ക്കാന്‍ നിരവധി വേഷങ്ങള്‍ ബാക്കിവച്ചാണ് സുശാന്ത് സിംഗ് വിടവാങ്ങിയത്.