ആര്യന്‍ കേസില്‍ ഗുരുതര ആരോപണങ്ങള്‍; അന്വേഷണത്തില്‍നിന്ന് വാങ്കഡെയെ മാറ്റി

ആര്യന്‍ ഖാന്‍ പ്രതിയായ ലഹരിക്കേസിന്റെ അന്വേഷണ നേതൃത്വത്തില്‍നിന്ന് സമീര്‍ വാങ്കഡെയെ മാറ്റി. സമീര്‍ വാങ്കഡെയ്‌ക്കെതിരെ ആരോപണങ്ങള്‍ ഉയര്‍ന്ന സാഹചര്യത്തിലാണു നടപടി. എന്‍സിബി ഉദ്യോഗസ്ഥന്‍ സഞ്ജയ് സിങ്ങിനാണ് അന്വേഷണ ചുമതല. 1996 ബാച്ചിലെ ഒഡിഷ കേഡറില്‍നിന്നുള്ള ഉദ്യോഗസ്ഥനാണ് സഞ്ജയ് സിങ്. കേസ് ഒത്തുതീര്‍പ്പാക്കാന്‍ ആര്യന്റെ പിതാവ് ഷാറുഖ് ഖാനില്‍നിന്ന് ഉന്നത ഉദ്യോഗസ്ഥനും ഇടനിലക്കാരനും 25 കോടി രൂപ ആവശ്യപ്പെട്ടതായി കേസിലെ സാക്ഷി വെളിപ്പെടുത്തിയിരുന്നു. 25 കോടി ചോദിച്ചെങ്കിലും 18 കോടിക്ക് തീര്‍പ്പാക്കാമെന്നു ധാരണയായി. ഇതില്‍ എട്ടു കോടി രൂപ സമീര്‍ വാങ്കഡെയ്ക്ക് ഉള്ളതാണെന്ന് ഒത്തുതീര്‍പ്പിന് മുന്‍കൈ എടുത്ത പ്രധാന സാക്ഷി കെ.പി.ഗോസാവി ഫോണില്‍ പറയുന്നതു കേട്ടെന്നാണു മറ്റൊരു സാക്ഷിയായ പ്രഭാകര്‍ സയിലിന്റെ വെളിപ്പെടുത്തല്‍. മഹാരാഷ്ട്ര മന്ത്രി നവാബ് മാലിക്കും സമീറിനെതിരെ ആരോപണങ്ങള്‍ ഉയര്‍ത്തിയിരുന്നു.