ന്യുട്ടണ് ഒരു കോടിയുടെ കേന്ദ്രസഹായം

ബ്‌ളാക്ക് കോമഡി വിഭാഗത്തില്‍ ഇന്ത്യയിലെ തന്നെ ഏറ്റവും മികച്ച ചിത്രമെന്ന ഖ്യാതി നേടിയ ന്യൂട്ടന് ഓസ്‌ക്കാര്‍ എന്‍ട്രിക്ക് പിന്നാലെ കേന്ദ്രസര്‍ക്കാരിന്റെ ഒരു കോടി ധനസഹായവും. തെരഞ്ഞെടുപ്പുമായി ബന്ധപ്പെട്ട് ഇന്ത്യന്‍ രാഷ്ട്രീയത്തെ ആക്ഷേപ ഹാസ്യത്തിലൂടെ അവതരിപ്പിച്ച ബോളിവുഡ് സിനിമയാണ് 'ന്യൂട്ടന്‍'.

ഓസ്‌ക്കറിന് അയയ്‌ക്കേണ്ട ചിത്രങ്ങളുടെ തെരഞ്ഞെടുപ്പ് നടത്തുന്ന 14 അംഗ ജൂറി വെള്ളിയാഴ്ചയാണ് ഈ സിനിമ തെരഞ്ഞെടുത്തത്. മികച്ചതും അര്‍ത്ഥവത്തായതുമായ സിനിമകളെ പ്രോത്സാഹിപ്പിക്കുന്നതിന്റെ ഭാഗമായിട്ടാണ് സാമ്പത്തിക സഹായം നല്‍കുന്നതെന്ന് ജൂറി ചെയര്‍മാന്‍ സി വി റെഡ്ഡിയെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു. ന്യൂട്ടന്‍ ഓസ്‌ക്കറിനുള്ള ഇന്ത്യയുടെ ഔദ്യോഗിക എന്‍ട്രി ആകുന്നത് തനിക്ക് ഏറെ സന്തോഷം നല്‍കുന്നതായി രാജ്കുമാര്‍ റാവു പറഞ്ഞു. ദൃശ്യം ഫിലിംസ് നിര്‍മ്മിച്ച ചിത്രം സംവിധാനം ചെയ്തിരിക്കുന്നത് അമിത് വി മാസുര്‍ക്കറാണ്.