പുനീതിന്റെ പാത പിന്തുടര്‍ന്ന് ആരാധകര്‍; 20 ദിവസങ്ങള്‍ക്കിടെ നേത്രദാനത്തിന് സന്നദ്ധത അറിയിച്ചത് 7000 പേര്‍

കന്നഡ നടന്‍ പുനീത് രാജ് കുമാറിന്റെ മരണം സിനിമലോകം ഏറെ ഞെട്ടലോടെയാണ് കണ്ടത്. മരണത്തെ തുടര്‍ന്ന് അദ്ദേഹത്തിന്റെ കണ്ണുകള്‍ ദാനം ചെയ്തിരുന്നതായുള്ള വാര്‍ത്തയും പുറത്തുവന്നിരുന്നു. ഇപ്പോഴിതാ പുനീതിന്റെ പാത പിന്തുടര്‍ന്ന് അദ്ദേഹത്തിന്റെ ആയിരക്കണക്കിന് ആരാധകരാണ് നേത്രദാനത്തിനായി മുന്നോട്ടുവന്നിരിക്കുന്നത്. കഴിഞ്ഞ 20 ദിവസങ്ങള്‍ക്കിടെ തങ്ങള്‍ക്കു ലഭിച്ച നേത്രദാന സമ്മതപത്രങ്ങള്‍ 7000ല്‍ അധികമാണെന്ന് നാരായണ നേത്രാലയ ആശുപത്രിയുടെ ചെയര്‍മാനും മാനേജിംഗ് ഡയറക്ടറുമായ കെ ഭുജംഗ് ഷെട്ടി വാര്‍ത്താ ഏജന്‍സിയായ എഎഫ്പിയോട് പറഞ്ഞു. പുനീതിന്റെ മരണശേഷം 112 കണ്ണുകള്‍ അതായത് 56 പേരുടെ നേത്രദാനം ഇതിനകം നടന്നുകഴിഞ്ഞെന്നും അദ്ദേഹം അറിയിച്ചു. സോഷ്യല്‍ മീഡിയയിലൂടെ പുനീത് ആരാധകര്‍ നേത്രദാനത്തിന്റെ സന്ദേശം കൂടുതല്‍ പേരിലേക്ക് എത്തിക്കുന്നുമുണ്ട്. ജീവിതത്തിന്റെ ഒരു വലിയ ഭാഗവും കാരുണ്യപ്രവര്‍ത്തനങ്ങള്‍ക്കായി നീക്കിവെച്ച വ്യക്തിയായിരുന്നു പുനീത് രാജ്കുമാര്‍. ഒക്ടോബര്‍ 29 ന് ഹൃദയാഘാതത്തെ തുടര്‍ന്ന് ബാംഗ്ലൂരിലെ വിക്രം ആശുപത്രിയില്‍ വെച്ചായിരുന്നു പുനീതിന്റെ മരണം. ജിമ്മില്‍ വച്ച് ശാരീരിക അസ്വസ്ഥതകള്‍ അനുഭവപ്പെട്ടതിനെ തുടര്‍ന്നായിരുന്നു താരത്തെ ആശുപത്രിയില്‍ പ്രവേശിപ്പിച്ചത്. പ്രശസ്ത നടന്‍ രാജ്കുമാറിന്റെ മകനാണ് പുനീത്. സന്തോഷ് അനന്ദ്രത്തിന്റെ 'യുവരത്ന' ആണ് പുനീതിന്റെ ഏറ്റവും ഒടുവിലിറങ്ങിയ ചിത്രം. ജയിംസ്, ദ്വിത്വാ തുടങ്ങിയ ചിത്രങ്ങളില്‍ അഭിനയിച്ചുകൊണ്ടിരിക്കെയായിരുന്നു താരത്തിന്റെ അപ്രതീക്ഷിത വിയോഗം.