കോട്ടയം ജില്ലാ പഞ്ചായത്ത് പ്രസിഡന്റ് പദവിയില്‍ നിന്ന് തന്റെ നോമിനി രാജിവയ്ക്കില്ലന്ന് തോമസ് ചാഴിക്കാടനെ കൊണ്ട് പ്രഖ്യാപിപ്പിച്ച് യുദ്ധമുഖം തുറന്ന് ജോസ് കെ മാണി. കഴിഞ്ഞ ദിവസം ജോസ് കെ മാണിയെ വിട്ട് പുറത്തുവരാന്‍ തോമസ് ചാഴിക്കാടനോട് അഭ്യാര്‍ത്ഥിച്ച കോണ്‍ഗ്രസ് നേതാക്കള്‍ക്ക് തന്റെ ഒപ്പമുള്ളവരെ നിരത്തിക്കാണിച്ച് കരുത്ത് തെളിയിച്ചിരിക്കുകയാണ് . എന്നാല്‍ തുടക്കം മുതല്‍ അരയും തലയും മുറുക്കി നിന്നിരുന്ന റോഷി അഗസ്റ്റിന്‍ പിന്നാോുമാറിയത് ചെറിയ ക്ഷീണമുണ്ടാക്കിയിട്ടുണ്ട്. ഇന്ന് റോഷിയുമായി ചര്‍ച്ച നടത്തി വീണ്ടും പോരാട്ടത്തില്‍ സജീവമാക്കാനുള്ള നടപടികള്‍ തുടങ്ങിക്കഴിഞ്ഞു. ജില്ലാ പഞ്ചായത്ത് പ്രസിഡന്റ് പദവി സംബന്ധിച്ച് ഒരിക്കലും ഉണ്ടായിട്ടില്ലാത്ത ധാരണ അടിച്ചേല്‍പിക്കാന്‍ നോക്കുന്നത് അംഗീകരിക്കില്ലെന്നു കേരള കോണ്‍ഗ്രസ് എം (ജോസ് വിഭാഗം) ഉന്നതാധികാര സമിതി അംഗങ്ങളായ തോമസ് ചാഴികാടന്‍ എംപി, ഡോ.എന്‍.ജയരാജ് എംഎല്‍എ എന്നിവര്‍ പറഞ്ഞു. തങ്ങള്‍ പങ്കാളിയായ ഒരു ഉഭയകക്ഷി ചര്‍ച്ചയിലും ഇത്തരമൊരു ധാരണ ഉണ്ടായിട്ടില്ല. ജില്ലാ പഞ്ചായത്ത് പ്രസിഡന്റ് തിരഞ്ഞെടുപ്പിന്റെ തൊട്ടു മുന്‍പ് യുഡിഎഫ് നേതൃത്വം നടത്തിയ ചര്‍ച്ചയില്‍ പ്രസിഡന്റ് പദവി സംബന്ധിച്ചു ജോസഫ് വിഭാഗം മുന്നോട്ടുവച്ച അവകാശവാദം തള്ളിയതാണ്. ഒറ്റ രാത്രികൊണ്ട് കാലുമാറിയ ആള്‍ക്ക് പാരിതോഷികമായി ജില്ലാ പഞ്ചായത്ത് പ്രസിഡന്റ് പദവി നല്‍കാനാവില്ല എന്ന നിലപാട് യുഡിഎഫ് നേതൃത്വത്തെ അന്നത്തെ ചര്‍ച്ചയില്‍ത്തന്നെ അറിയിച്ചിരുന്നു എന്നും ഇരുവരും പറഞ്ഞു. സെബാസ്റ്റ്യന്‍ കുളത്തുങ്കല്‍ ജില്ലാ പഞ്ചായത്ത് പ്രസിഡന്റായി തുടരുമെന്നും ഇരുവരും അറിയിച്ചു.സ്ഥിതിഗതികള്‍ ചര്‍ച്ച ചെയ്യാന്‍ ജോസ് വിഭാഗം യോഗം ഇന്നു ചേരും. കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനം സംബന്ധിച്ച യുഡിഎഫില്‍ തുടരാന്‍ അര്‍ഹതയില്ലെന്നും ജോസഫ് പറഞ്ഞു. കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനം പങ്കുവയ്ക്കുന്നതു സംബന്ധിച്ചു കേരള കോണ്‍ഗ്രസിലെ ജോസ്- ജോസഫ് വിഭാഗങ്ങള്‍ തമ്മിലുള്ള തര്‍ക്കം സംബന്ധിച്ച് യുഡിഎഫ് ഇന്ന് അന്തിമ തീരുമാനമെടുക്കുമെന്നു പ്രതിപക്ഷ നേതാവ് രമേശ് ചെന്നിത്തല. ഇതു സംബന്ധിച്ചു നേരത്തേ ധാരണയുണ്ടായിരുന്നു. അതു പാലിക്കണമെന്നാണു ജോസ് വിഭാഗത്തോട് യുഡിഎഫ് ആവശ്യപ്പെട്ടിരിക്കുന്നത്. ഇതുവരെ അവര്‍ അതു പാലിച്ചിട്ടില്ല. ഇതിനായി യുഡിഎഫ് യോഗം ചേര്‍ന്നു ചര്‍ച്ചയില്ലെന്നും തീരുമാനമെടുക്കുകയാണു ചെയ്യുകയെന്നും രമേശ് വ്യക്തമാക്കി.